Talosaga Tete'e E Fa'asaga I Totogi Amata

Sign this petition online

TALOSAGA TETE’E E FA’ASAGA I TOTOGI AMATA Taofi le Fa’atulafonoina Fa’a-feterale o Totogi Amata i Amerika Samoa O MATOU, o loo saini lima i lalo, o tagatā-nuu o Amerika Samoa, ua ‘aioi ma talosaga atu i le Afioga ia Barrack Obama, le Peresitene o Amerika, mo se fesoasoani ma se lavea’i i le toe fa’afo’i lea i tua o le tulafono e uiga i totogi amata, i le tatalaina lea o le vaega o le Tulafono o loo aiaiā ai Amerika Samoa mai le Fair Minimum Wage Act o le 2007 (Public Law 110-28), ma toe fa’afo’i le fuafua tatau o totogi amata ile Komiti Faapitoa o Pisinisi Tetele.

O le Tulafono o le Fair Labor Standards e aofia ai galuega i totonu o Amerika Samoa e pei o galuega i totonu o Amerika. Ae le’i o’o la ia Ianuari 24 o le 2007, na faatulaga ai e le Komiti Faapitoa o Pisinisi Tetele le totogi amata i totonu o Amerika Samoa – o lenei komiti na faatuina e le Matagaluega o Leipa a le Iunaite Sitete. Ua mae’a ona faatulaga totogi amata i totonu o Amerika Samoa i lalo ole tulafono o Aiā Tutusa i Totogi Amata 2007 (Tulafono Lautele 110-28), ma o loo iai ma le $0.50 ile itula e faaopoopo i tausaga taitasi ia Me aso 25, ma faaauau ai lava se’ia oo ina ia tutusa ma totogi amata a le Iunaite Sitete. O le faamaoniaina o le tulafono mo Aiā Tutusa i Totogi Amata (Fair Minimum Wage Act 2007), ua faafuase’ia ai le tetele o le faaseā o le atunuu, ma sa iai fo’i valo’aga o le a matua’i afaina le tamaoaiga o Amerika Samoa. Sa iai le popolega, o falei’a tu’u apa, le faavae lea o le tamaoaiga, o le a o ese atu pe faaitiitia ana galuega - o le a fai lea ma mafua’aga e le mafai ai e isi pisinisi poo le Malo ona taofi tagata faigaluega o loo iai nei. Ua faamaonia nei valo’aga a le atunuu! E tasi le falei’a tuu apa ua amata ona tapena le o ese atu, a o le isi ua faaitiitia ana tagata faigaluega i le 20%. O le faafitauli ua tula’i mai nei i falei’a tuu apa ua mafua ai le fenumia’i ma le lē mautonu o fai-pisinisi – o le a mafai ona faaitiitia galuega pe tapunia fo’i. Talu ai ona o le la’ititi o le tupe maua ale Malo mai lafoga maua, ua masalomia e 7,500 tagata o le a leai ni galuega i le tausaga lenei. Sa faia se su’esu’ega a le Matagaluega o Leipa a Amerika e vaai ai poo le a se ōgaōga o le afaina o le tamaoaiga mai siitaga o totogi, ae sa te’ena e le Konekeresi. Na filifili le Konekeresi e faamaonia le tulafono e aunoa ma ni faamatalaga taua. O lenei talosaga tete’e e tau sa’ili ai se to’omaga o le atunuu mai mafatiaga ua oo mai talu le siitaga o totogi amata/maualalo. O loo iai se faanaunautaiga i le faavavevave ona sa’ilia o ni isi pisinisi tetele e sui tulaga I falei’a, ae faigatā ona e lē gafatia e le tulaga o Amerika Samoa le fai pa’aga ma pisinisi mai fafo, talu ai lava le tulafono fou a le fetarale e uiga i siitaga o totogi. O le tulafono faa-feterale o loo iai nei itotogi amata e maualuga tele nai lo isi motu taua’oi. O i latou uma o loo saini i lenei talosaga tete’e e tumau ma mausalī le talitonuga e lē talafeagai ona fa’aogaina le tulaga o totogi a Amerika i Amerika Samoa, ma o le mea lea ua fa’atagisia ai le fesoasoani a le Peresitene a le Iunaite Sitete ina ia fai ni faiga fa’apea: 1. Toe liuliu le Tulafono Lautele 110-28, e tuu ai nao le siitaga muamua o le $0.50 faaopoopo I le itula; ma 2. Toe fa’afo’i le fuafua tatau o totogi amata a Amerika Samoa ile Komiti Faapitoa o Pisinisi Tetele.